本港地產商大都有自己地頭，例如提九倉（004）大家想起尖沙嘴，講中環諗到置地，希慎（014）係銅鑼灣大業主，太古地產（1972）就令人想到港島東，太古城、太古坊都係太地發展嘅。
太地𠵱家至7月26日就喺太古坊舉辦一個名為「尋求港島東的故事」嘅展覽，兼且搵來15位一直喺港島東生活嘅長者，以口述歷史模式出咗本書話當年，印咗3,000本在場免費派發。
書中其中一位年屆70嘅雷用珠女士相當特別，佢係本港第一代女電車司機，1973年加入電車公司，當年只得18位女司機，佢係其中一員。原來當年電車公司規定，女司機每日只能工作8小時，仲要係好似灰姑娘咁，午夜12點前一定要收工㗎。適逢今年係電車公司110周年，唔知電車公司會否邀請雷女士出席周年活動呢？