《証人》的洪荊，《激戰》的程輝，令張家輝兩奪香港電影金像獎影帝，由笑匠化骨龍徹底改變戲路，顯示其演技實力，今趟家輝在恐怖電影《盂蘭神功》，不只玩演技般簡單，更首執導筒，自導自演一角，家輝更點名邀請高登女神劉心悠飾演一對。家輝處男下海做導演，他坦言沒有野心拿導演獎，只想重溫昔日到戲院欣賞鬼片的情懷。
撰文：溫敏芝
張家輝一向肯拚及肯試，近日他首執導演筒，選擇開拍一部恐怖電影，日前張家輝與劉心悠在九龍灣接受訪問，家輝說：「揀呢個題材首先係鬼，人好奇怪，越驚就越想掂，不過亦有好幾個原因想拍，喺我成長嘅鬼戲題材越嚟越少，但無獨有偶近排有《殭屍》、《迷離夜》等等，所以自己都想拍。至於揀盂蘭節，係因為富有神秘感，亦係中國傳統習俗節日，我細個接觸盂蘭節好似小朋友嘉年華，好多嘢睇好多嘢食，似遊樂場咁，所以今次有機會，投資方又可以放棄其他市場考慮，我就膽粗粗試吓。」
第一次自導自演，張家輝不覺得太辛苦，但經過這次經驗後，他會更加欣賞自己合作過的導演。有否為做導演增添興趣？他說：「冇驚到，但挑戰自己個心大咗，今次係自己第一次，又擔當兩個角色（導演及演員），好吃力，將來有機會嘅話，我只想擔當導演角色，唔好做埋演員。」家輝今次與過往的「硬淨」角色不同，反而飾演一個文弱書生，講述外行人的家輝要為父親接管劇團，當中遇到種種怪事，劇團的花旦劉心悠為感激班主（家輝父親）多年來知遇之恩，故落力協助家輝。
咀嘴測試鬼上身
開拍前，家輝指定找高登女神劉心悠，對她情有獨鍾，家輝說：「係呀，一開始冇諗過第二個女仔，因為個故事一講出嚟好適合佢去演，無論幻想空間，年紀背景，斯斯文文，已經覺得呢個應該係心悠。」在旁的劉心悠即靦腆說：「係呀，有一晚佢打畀我，初初仲以為係整蠱電話，後尾先認番佢把聲，今次部戲好吸引我有兩個原因，第一係未試過同家輝合作，同埋有機會嘗試演鬼上身，我一向都想做多啲肢體嘅表演，今次要吊威吔飛來飛去。」家輝坦言拍攝時都驚弄傷心悠，但知道她是運動型女仔，應該難不到她。
談到二人在戲中的親嘴戲，家輝笑說：「有少少喇，但唔係露骨嘢，嗰場戲係想大家估吓佢係咪鬼上身。」心悠是高登女神，家輝會否怕網民妒忌？家輝即笑說：「怕呀，梗係怕喇，你知佢領住幾十萬大軍㗎嘛，但冇嘢嘅，都係做嘢，唔係好激。」身邊的心悠被問到咀家輝的感覺，她即面紅說：「我投入囉。」然後心悠望住家輝只懂儍笑，都不知說甚麼好了。
執導唔為攞獎
家輝已兩奪香港電影金像獎影帝，今次會否視新晉導演獎為目標？家輝坦言自己不敢當，亦沒這份野心，純粹是大膽嘗試，希望可以將來再做好一點。劉心悠則大讚家輝在片場非常認真，至於她今次難度之一就是演鬼上身，她說：「我以前對鬼上身感覺係一秒，之後我上網搵資料，但好多都係流嘅，玩嘅，都要諗諗點樣演繹。」訪問時，心悠在現場稱呼家輝做導演，笑言：「一日係導演終生都係導演，所以會尊重佢。」家輝即笑說：「佢個人真係好好玩，不過宣傳先敢同佢玩，佢會滿足到嚇佢嗰個人，好似玩具咁。」心悠即笑說：「你再講我就嚟出拳，佢永遠喺我好投入就嚟一下，真係想「舂」人，哈哈！」
【學界佔中 黃竹坑現場】YouTube 重溫：
http://bit.ly/71march