立法會又流會，創新及科技局都流流哋，睇嚟今年未必搞得成。IT界的朋友想搞新project，等政府等到蚊瞓。冇支援租金高人手貴，年輕朋友想創業都望門興嘆，至少搵資金太難，尤其是創新科技，很少投資者願意冒風險，投資一個概念，投資未知之事。
筆者間中會到美國Kickstarter網站，一來睇吓外國有甚麼創新的科技諗頭，二來可以趁早加入Backer行列執平貨。
簡單嚟講，Kickstarter係一個網上集資平台，網民可以成為Creator，用文字、相片和影片介紹創新大計，然後網民可以做Backer ，在計劃開始時成為散戶投資者，換取產品的優先擁有權，又或者其他Creator開出的「福利」。筆者去年就投資了立體筆3Doodler做Backer，今年收到新科技玩具，在網上炫耀一下眼光，頗有虛榮感。而這個Kickstarter Project很快就正式在零售市場上市，似乎是個頗成功的創新科技計劃。
加入智能手錶行列
沉寂了好一陣，似乎冇乜新project吸引到我做Backer，直至近來有舊同學Jacky在facebook分享了一隻叫Moment的Smartwatch。360度的顯示屏和手鈪般的弧形設計，甚為討好。一問之下，原來這是他和美國朋友合作研發的新產品，個幾星期已經在 Kickstarter募集了近20萬美元的經費，多過原來預算一倍。
對於Smartwatch，市場毀譽參半，筆者最近也加入Smartwatcher的行列，買了Samsung的運動型智能手錶，配合手機程式可以做些跑步紀錄和心跳測量。用後感是功能簡單得來對辦，外形也不過不失，不過電池每兩、三日就要叉，係一大缺點。
產品吸引 抵銷缺陷
Jacky話：「我們的設計，外形似乎係最大賣點，不過其實產品的真正賣點是科技：低耗電的e-ink顯示屏，可以使用三十天才充電，顯示屏的介面也可以隨使用者喜好調動。錶的內櫳有一個菱形插槽，未來會開發不同的功能插件，例如醫療功能，可以記錄長期病患例如糖尿病患者的身體狀況，我相信是未來大方向。」我說：「嗯，所以要三十日電量？不過，長期病患或老人家未必戴到咁潮的手錶吧？」Jacky：「……好，廣告到此為止，我最感興趣的是在Kickstarter集資的成功秘訣。「始終網友未必有耐性去讀你的字，圖片和影片很重要。」「但係你哋條片都好求其喎？」「……係，因為我哋冇Marketing Team，所以都係自己搞宣傳。不過事實證明，product夠吸引，可以抵銷其他缺憾。另外，和網友的互動亦好重要，回答佢哋的留言，每日更新進度，建立fans群，可以令成件事更有說服力。目前的Backer主要來自美國和德國，但有個熱心的意大利擁躉好投入，經常在留言版幫我解答網友提問，我都考慮會不會招攬佢同我哋合作。」
唔係賣廣告，但真心認為香港的創意產業需要我哋支持，有興趣朋友可上 http://www.kickstarter.com搜尋 "Moment"，只需要188美元就可以認購首批智能手錶，唔買就笨。
Profile：柳俊江
前新聞記者、主播，動物NGO工作者。現為自由傳媒人兼「另類生態學家」，透視傳媒生態、動物生態、社會生態。《反智動物》討論最高智商靈長類動物之種種反智行為。