世界盃踢咗咁多場波，為唔少球員帶嚟最崇高舞台，同時亦係球員要證明自己嘅最佳機會。比賽精采就大家都知，當中有人老當益壯，有人閃耀登場，亦都有長江後浪推前浪，因而帶動今夏轉會市場十分活躍。今日就話畀大家知一眾靚仔球星嘅轉會消息啦，等大家9月要繼續追星都知窿路。
靚仔迪維積成魔
首先係光芒四射嘅哥倫比亞中場占士洛迪古斯，摩納哥要留佢睇怕要加多幾錢肉緊，而佢爸爸就話阿仔想加盟皇馬，其實佢呢副明星相應該考慮吓英超，一定拍廣告都拍到腳軟。英格蘭兩位新星帥哥，勞基梳爾同拉爾拉拿就分別加盟曼聯同利物浦。當阿蘇可能加盟巴塞隆拿嘅同時，智利國寶阿歷斯山齊士就好大機會由巴塞轉投阿仙奴。雲高爾仲好有可能帶走荷蘭靚仔後衞迪維積（圖）去曼聯，令紅魔迷期待不已。
停賽就叫坐波監
大家知唔知咩叫「坐波監」呢？其實就係指球員被罰停賽。世界盃場場硬仗，所以球員應該避免拎牌或做出不君子行為，好似阿蘇咁要坐4個月波監就認真慘嘞！
陳婉婷
太陽飛馬助教
識睇 一定睇蘋果嘅足動世盃：
http://worldcup2014.appledaily.com/