做球迷係辛苦嘅，做世界盃球迷更辛苦，大家見到街上一班恍如行屍走肉活死人着住各國家隊波衫四出搵地方睇波時，就知道今晚又有世界盃賽事！四年一度唔睇唔得，做得球迷更加係要識得喺世盃期間變身，做賭神、博士、孝子、病人、偶像、球員乜都要試，世盃奇遇記其實日日都上演。
撰文：蘇芬妮
【扮球員 波衫出動】
每逢佳節倍思親，每到世盃出波衫，既係運動品牌嘅常識，亦係球迷大力科水嘅時候，為咗表示自己同愛隊一條心，實行買齊32件國家隊波衫，等球隊出場時一齊起立唱國歌。
【扮博士 學拋書包】
世界盃的必然現象，就是全民皆波，無論男女不分老嫩都變身球壇博士，將賽事分析得頭頭是道，令各位就算昨晚沒有看波，都可以得知賽果以及成敗原因。
【扮旁述 越位教學】
要尋找一位識波的女友，真係可遇不可求，要解答身邊女人睇波時的問題，尤其越位呢類比基本法更難解釋嘅專業名詞，講波佬其實唔易做。
【扮球星 潮Look出動】
早幾代世界盃有碧咸，大家抄髮型都抄到儍，今屆靚仔嘅C朗、J洛都出晒局，連巴西球星尼馬都因傷緣盡世界盃，班追星球迷仲有乜嘢寄託呀！
【扮熊貓 Cosplay襲港】
睇世界盃預咗捱更抵夜，尤其今屆在巴西舉行，賽事於香港時間凌晨甚至清早舉行，有些瘋狂球迷，係都要睇晒64場賽事，結果熊貓眼一人掛住一對。
【扮病人 詐病曠工】
前鋒要識射波，打工就最棹忌「射波」，即係請病假！今屆世盃四強賽事全部凌晨4點開波，隨時完場已經夠鐘返工。所以當發現同事又no show而昨晚又有賽事，請勿大驚小怪。
【扮擁躉 捧勝利隊】
每到世界盃呢類大賽，都有一班平日唔睇波嘅「偽球迷」出現，其中有一類極品叫「勝利球迷」，即見邊隊勁就捧邊隊，難怪近日多了很多哥倫比亞擁躉啦！
【扮賭神 認有眼光】
世界盃踢足64場，平日唔睇波嘅都可能會估吓波膽貼吓冠軍，結果人人都走出來扮賭神，死充自己如何有眼光，貼中咗當然要四圍唱，貼錯咗就必定係有球隊打假波，球證玩偏幫。
【扮孝子 慘哭波喪】
除咗偽球迷討厭，有時死忠球迷都好難頂，尤其佢哋所捧嘅愛隊出局時，佢哋除咗會喺社交網站甫文貼圖無病呻吟，仲可能當面哭訴，投訴球證不公，嘆愛隊欠運。
【扮開P 忌賭身家】
世盃有人輕鬆估波膽，亦有人搏命賭身家，今屆賽事強隊頻出事，結果有多宗懷疑球迷賭波輸錢燒炭事件。還勸各位球迷，睇波時可以純粹欣賞球技，太攰就瞓覺，千祈咪瞓身。
識睇 一定睇蘋果嘅足動世盃：
http://worldcup2014.appledaily.com/