睇世界盃坐多過企，今期瑜伽導師Faye教你一連串半蹲動作，對強化大腿好有幫助，動作中左右彎腰亦可伸展腰腹。今次係一連串嘅動作，當中包含3個瑜伽甫士，適合中場休息時做。
記者：徐嘉華
攝影：黃賢創
瑜伽導師：Faye Cheung（HKYA-ACI 200、HKYA-ACIA 500、Hayabusa導師）
場地：中環Hayabusa
1.企直後，身體向前彎，雙手按地，右腳踏後，前腳90度屈膝，吸氣，上身提起做「戰士一式」，停留10個呼吸，左手踭放大髀上，右手向上提起，身體同時彎向左邊，做側彎腰動作，同樣靜止10個呼吸；吸氣，上身回原位，將右手放喺左大髀後，上身轉回前方。
2.左手向上提起，呼氣，上身向後彎，前腳坐低至屈膝90度，可強化大腿同伸展腰部；吸氣，上身回原位，將左手放左腳掌上，右手向上伸展然後向左彎腰，做「坐馬三角式」，停留10個呼吸。
3.保持上述動作不變，前腳盡量蹬直，做「三角式」，左邊臀部推向前，右邊臀部拉向後，停留10個呼吸後，後腳踏前，雙手掂地，做一個前彎腰嘅動作，以伸展你嘅腰椎，吸氣，上身回原位，緊記左右兩邊交替做，做3至4組。
識睇 一定睇蘋果嘅足動世盃：
http://worldcup2014.appledaily.com/