【港女點評】
【本報訊】對於足球，男人說︰「我為睇球賽通頂」，女士說︰「我為睇靚仔捱夜」。男人不屑女士不懂足球。女士埋怨男人不解溫柔。世界盃進入最後四強，前新聞主播黃紫盈（紫盈BB）遇上「燈神」董嘉儀（LuLu），兩位習慣被仰慕的女神，齊齊大談喜愛的靚仔球星，捍衞睇靚仔的權利。
記者：韓耀庭
記者︰
你哋覺得邊隊最多靚仔球星？最鍾意嘅球星係邊個？
紫盈︰我覺得心地靚重要過外表靚，但有一個外表靚得嚟心地都幾好……
LuLu︰（追問）邊個呢？
紫盈︰C朗！最近有單新聞，有個BB患腦癌，佢媽媽寄封信畀C朗，希望C朗可以捐件簽名波衫畀佢拍賣，等BB可以做手術，但C朗唔只寄件波衫畀佢，仲捐埋錢畀佢。因為個BB要開腦做手術，C朗自己個髮型亦𠝹咗兩條痕，話畀BB知一齊作戰，我好欣賞佢人品。
LuLu︰我都有睇呢單新聞。（開玩笑提議）不如你考慮吓……
紫盈︰（失笑）我相信佢有好穩定嘅伴侶，我唔做呢啲嘢，哈哈！
「我睇髮型性格」
LuLu︰我其實唔係睇樣，我會睇髮型先，然後睇埋性格，所以我鍾意巴洛迪利。
紫盈︰因為佢成日整唔同髮型。
LuLu︰係！另一個係派路，其實佢好有錢，但佢踢波唔係計較錢，足球係佢夢想。
紫盈︰（認同）咁樣好有魅力呀！
LuLu︰佢個髮型都好有魅力㖭！哈哈！
記者︰好多男仔覺得女仔唔識足球，你哋想唔想平反？
紫盈︰我相信LuLu係識嘅，但我就唔係好熟，但冇所謂，我身邊啲朋友唔算係好熱衷嗰種足球迷，一班人一齊睇，討論吓仲開心。
LuLu︰（睇波時）我又唔係會問啲好儍嘅嘢，反而男仔好鍾意做教練，我覺得應該有班女仔喺隔籬聽佢哋點樣教，佢哋會好有成功感。
記者︰不如講吓支持邊隊奪冠？
LuLu︰德國！有個神射手幾勁，叫湯馬士梅拿！
紫盈︰（猶豫）荷蘭同德國我都支持。
LuLu︰不如你支持荷蘭，我支持德國！
紫盈︰荷蘭就有尹佩斯，其實佢就唔靚仔，唔係C朗嗰種，但ok嘅，順眼。我欣賞佢就係一個好爸爸，同埋真係腳法好。
LuLu︰尹佩斯ok嘅，charm！同埋佢真係幾好波。
記者︰世界盃尾聲，會唔會睇晒之後所有比賽？
紫盈︰（搖頭）要睇時間，因為我除咗每朝早5點半起身要去電台開咪做節目，下晝要返工，我唔可以摧殘自己健康！
LuLu︰我一定要睇，16強同8強已經咁刺激，4強一定唔可以放過，我係一個全職球迷，哈哈！
後記︰
足球，可拉近國與國的距離；足球加靚仔，拉近了兩位女神的距離。原來紫盈BB與LuLu是第一次見面，她們因足球結緣，幸沒有因靚仔而結怨，不然訪問現場Hair Corner會比世界盃決賽的球場更重火藥味。
識睇 一定睇蘋果嘅足動世盃：
http://worldcup2014.appledaily.com/