咪以為靚仔真係大晒，其實有時都好慘㗎。好似走「美派路線」嘅日本國腳右後衞內田篤人，由於太受女粉絲歡迎，搞到佢既唔可以退出藍武士，又唔可以結婚。事關日前傳出佢計劃喺今年同「同窗」女友結婚後，即刻有粉絲發出死亡威脅，聲言話如果佢結婚，就死畀佢睇！
想退出國家隊又唔得
現年26歲、身高1米76嘅內田篤人，向來係sell靚仔，佢嘅年曆好賣過AKB48，又喺「月九」（日本黃金時段劇集）客串過，唔知仲以為佢係尊尼事務所旗下其中一個Johnny仔，而唔係一個職業足球員。
日本喺今屆巴西世盃表現唔好，分組賽包尾出局，搞到佢有啲意興闌珊，話想退出國家隊。消息一出，佢龐大嘅粉絲團即時作出挽留，J-CAST仲做咗個民意調查問粉絲喺2018年俄羅斯世盃最想見到邊個國腳，結果佢得票率逾6成，遠遠拋離佢班隊友，被迫又好自願又好，內田只能夠回心轉意。
唔畀退出藍武士，咁結婚可以啩？Sorry，一樣唔得。本身好鍾意堀北真希同竹內結子等女優嘅內田篤人咁靚仔，點會冇緋聞呀？有傳佢曾經同兩個模特兒舞川亞郁（台裔）、佐藤亞璃紗，以及女主播加藤未央拍過拖，不過佢嘅結婚對象卻係個普通女仔。前幾日，有報道指佢決定喺今年內，同佢嘅清水高校同班女同學拉埋天窗。佢曾經咁講：「我身邊好多球員同朋友都結咗婚。對足球員嚟講，結婚可以令人定落嚟，而且我本身好鍾意小朋友，所以我好想抱自己嘅仔女入場睇波。」
「內田屬於我哋」
內田想結婚消息傳出後，呢次仲大鑊，佢班女粉絲紛紛表態反對佢結婚，其中有人咁話：「內田係屬於我哋嘅，佢唔可以結婚。」有個仲激，居然發出死亡威脅：「如果內田結婚，我就死畀你睇。」睇嚟內田如果真係結婚，都要秘密進行至得。
識睇 一定睇蘋果嘅足動世盃：
http://worldcup2014.appledaily.com/