【本報訊】前日在行政長官答問會上掟玻璃杯的獨立議員黃毓民，昨晚10時30分在支持者陪同下，到中區警署自首並隨即被捕，而警方晚上11時19分發出新聞稿，證實拘捕一名姓黃62歲男子涉嫌觸犯普通襲擊罪，而黃早前稱自己「食得鹹魚抵得渴」，已有被捕的心理準備，但質疑梁振英當日撿起玻璃碎片是破壞證物，「第日打官司，我一定傳召佢上庭」。
昨晚傳出警方將拘捕黃毓民，原在立法會議員辦公室工作的黃，隨即在律師王學今、黃洋達、以及一批支持者陪同下，在立法會主動見記者，透露他的律師已與中區重案組主管其案件的警員聯絡，「佢（重案組警員）證實喺搵我嘅」，又稱重案組之前未曾直接找他，只向傳媒放消息，「咁我𠵱家就直接去差館，同佢聯絡咗，到時佢要做啲咩呢，咁（如果）我行返出嚟、有得行出嚟，就話畀你哋（記者）聽囉」。
質疑梁破壞證物
黃又稱，他的律師知道重案組只有兩隊人，其中一隊承認負責此案，質疑對方為何不斷放風說要拘捕他，又不想警方「麻煩」，要有「霸氣」地自首，「咁我話唔使你（重案組）麻煩，我自己嚟，廢事你上我屋企拍醒我，或者我講緊波時，你入嚟無綫拉我，咁仆街唔得㗎嘛，係咪？咁我就畀啲霸氣你睇，𠵱家行入差館！」這時其身旁的支持者則高呼「撐毓民！」口號，黃則乘私家車前往中區警署，於10時30分左右進入警署，不久即證實被捕。
較早前黃毓民對記者說，相信警方會先找立法會保安落口供，又批評警方昨未知會立法會主席曾鈺成及秘書長陳維安下，進入立法會搜證，做法極有問題，「好罕見、好過份、好核突」。他指香港三權分立，警方要入立法會調查，要先徵求立法會主席和行管會同意，「點可以因為特首辦報警，法律就唔係人人平等？只服務佢？」黃更質疑梁振英當日撿起玻璃碎片是破壞證物，「第日打官司，我一定傳召佢上庭」。他又指前日掟玻璃杯只是想「掃佢（梁振英）場」，認為應由法官來判斷，他是否刻意掟向特首梁振英。