大家見到此文時，希望我估計冇錯：德國頂得住法軍，巴西亦都冇失場，然後下個禮拜可以欣賞巴西大戰德國。但如果係巴西對法國，本人以及一眾球迷係會有陰影，小弟問晒身邊朋友，大家對於1998年法仔大炒巴西奪冠一役，依然懷恨在心（當然仲有懷疑）。
再睇今晚荷蘭豆對哥斯達黎加，捉路一定係入球細再買和，儘管荷蘭燈友唔想見到，但哥斯達黎加真係守得下，而目標好明顯係90分鐘後加時再12碼。
至於阿根廷對比利時，都依然係細手交易，你睇番阿根廷近幾場，都知道唔係好入到波，但又會過到關咁樣。
回顧番世界盃前，有一日出街食飯，餐廳竟然開住亞視，又咁啱詹培忠做咩《香江怒看》嘉賓，仲要教人點賭至有錢贏（喺收視接近0嘅地方講呢啲！）。講出嚟大家一定恥笑：主客和一定場場買和，因為賠3倍上下，如果第一場輸，就1、2、4、8、16咁買落去，直至贏番為止，贏番又由頭買過一注。我當時心諗有發達橋，又點會周街派？而呢條儍佬仲要係詹培忠，你信佢一成都死。到今日大家睇番過去50幾場，如果照條懵佬咁買，未到16強，已經要懸樑。
但話分兩頭，如果你8強至開始買和，甚至上半場和，你應該可以執番多少。近兩屆近決賽尾幾場，都係先顧防守，自己留意下。
文：梁柏堅
識睇 一定睇蘋果嘅足動世盃：
http://worldcup2014.appledaily.com/