【九龍城】現年41歲嘅黎瑞恩（小恩子）早前同金利來三少曾智明離婚，結束12年婚姻。要獨力撫養兩名子女長大成人，聽聞靠嘅就係每個月20萬贍養費，對於有指佢收咗前夫一千萬元現金，小恩子當日話：「膝頭對上就髀（畀）！」嚟回應，言下之意即係冇收過啦。婚變後嘅小恩子表現好堅強，而且表現好開朗，好似7月1日當日，冇去遊行嘅小恩子一個人揸住部豐田爬山車，去咗九龍城賣生果好出名嘅永富幫襯。
駕車返新居
小恩子落車入到舖頭，老闆已經好好招呼，不停介紹新鮮嘅水果畀佢，而佢亦買得好梳爽，左點右指好快就買咗3大袋，產自日本嘅生果就特別得小恩子喜愛，之後老闆仲攞咗盒靚桃畀佢。當小恩子見到有記者喺門口影相時，佢笑笑口對住鏡頭揮手，到埋單找數都唔平，要差唔多兩千蚊。由於當時落緊雨，店員好細心幫佢擔遮送佢上車，另外有人幫佢攞啲貨放喺車尾。去到門口，好奇嘅小恩子忍唔住問記者：「你哋成日喺度等㗎。」之後佢開車返咗去亞皆老街嘅新居，始終呢度點都平過5萬5租大埔比華利山獨立屋嘅。
採訪、攝影：李志明、朱志聰、黃曉程
【學界佔中 黃竹坑現場】YouTube重溫：
http://bit.ly/71march