名導演「大隻新」健康一直麻麻，雖然醫生勸佢唔可以再飲酒，已叮囑佢老婆睇實佢，但只要老婆唔喺身邊，佢就一於少理。呢輪佢成日要去大陸荒蕪地帶拍外景，又偏僻又辛苦，佢老婆當然冇去做跟得夫人，結果大隻新好似放監咁日日飲一支威士忌，結果飲到暈低咗，第二日秘密入院留醫，住咗一日醫院，佢仲吩咐要封鎖消息，特別唔可以畀佢老婆知道。
怕老婆認低威
不過佢老婆唔知點解收到風，殺到嚟仲日日睇到佢實，但大隻新唔知係咪酒癮太深，定拍戲壓力太大，竟然偷偷飲，最後俾老婆發現咗，兩公婆大吵一場。飲大兩杯嘅大隻新惡過老虎，佢老婆都忌佢兩分，但第二朝酒醒後，佢面對老婆又變番貓仔，知道噚晚激嬲老婆咪要扮矮仔認錯囉！
撰文：關仁