陳友當年在電影的名句「two hands cannot catch four balls」傳誦一時，不過男士自然希望將「不能」變成「可能」。活躍於70年代band仔出身、擔任溫拿樂隊鼓手的陳友，到現在雖然身為上市集團的執行董事，還每星期一次到酒廊任鼓手，跟一班後生仔夾band。61歲人值得驕傲的，不只是可以跟一班後生仔一起玩，而是「60歲人仲有咁多頭髮」！去到尾男人最緊要都係要有頭髮，趁住有頭髮他最想將《溫拿那些年》搬上銀幕。
撰文：何永寧
陳友由70年代夾band夾到現在，依然樂此不疲，當年為興趣名利兼收，今日夾band動機單純──齋為玩。打了40年鼓，陳友仍然每星期在尖沙嘴的酒廊落力敲着，身邊隊友由溫拿換了一班80、90後的音樂人，樂隊名為Groovy 6.1，那「1」就代表着陳友自己。身高過6呎的他腰板挺直，加上一頭濃密頭髮，確實令不少後生仔汗顏：「60歲都有咁多頭髮算係咁，好難得㗎！」早年陳友與張堅庭一起成立二友電影公司，製作過《表錯七日情》、《殺妻二人組》、《一屋兩妻》，當中《一屋兩妻》的經典名句「One mountain cannot hide two tigers，two hands cannot catch four balls」是不少男人的心底話，只恨沒有4隻手。
趣味相投周末圍威喂
之後陳友返內地混了20多年，近年因太太患病而將基地移回香港，在一間上市娛樂集團擔任執行董事。上班時間是高級行政人員的時間，但每逢周五晚，他就變回band友在酒廊夾band：「都係機緣巧合，有次嚟聽歌飲嘢，識咗班後生仔，大家啱玩咪一齊玩吓，玩玩吓就上癮，逢星期五都要落嚟。」陳友透露樂隊成員不少都是在外國讀音樂，一到時候就化身音樂人，當中有的正職任大學助教、公關等專業人士：「你都知音樂人要養妻活兒唔易，難得佢哋有呢個心。我同佢哋玩有着數呀，拉勻計我變番30歲，幾抵呀，多謝肯參埋我玩呀。」
陳友笑言在溫拿時代，雖然以鍾鎮濤（阿B）及譚詠麟（阿倫）兩位主音最受歡迎，不過在台上還要聽鼓聲做人：「我打快啲，佢要唱快啲，打慢啲佢又要跟我。」在尖沙嘴這個酒廊以中產客為主，每晚9時後打兩個鐘左右，輕鬆愉快又一個周末晚上。
將溫拿那些年搬銀幕
陳友由音樂到電影人，本身又是娛樂集團話事人，在公在私都向着電影想。在內地多年得着的是，處境喜劇是兩地都能融合接受的電影題材，目前他正構思將溫拿樂隊的那些年故事拍成電影：「溫拿除咗係香港人嘅集體回憶，對內地人都唔陌生，而且好有情懷。將一班後生仔成長奮鬥嘅古仔拍出嚟，喺好《那些年》式嘅電影。」他認為勵志電影放於四海皆通。
【學界佔中 黃竹坑現場】YouTube重溫：
http://bit.ly/71march