你冇睇錯。過去幾天，我飛泰國睇波去了。
因為唔鍾意上網睇波窒吓窒吓，曾經幾次為睇世盃，死死氣安裝收費電視。世盃結束後，有條線的新聞台還勉強可以睇吓，但今屆世盃係「是旦台」播喎，之後23個月唔通睇經典台神鵰俠侶？條氣唔順，唔想畀錢「是旦台」賺。
我密謀出遊。小組賽後半段至16強、香港冇免費波睇期間，外地五星酒店實有得睇。心想小組賽不是組組有睇頭，16強就點都要睇。單就16強入8強的8場波來算，酒吧睇每人平均消費$250，8場盛惠$2,000。查遍就近亞洲國家足以睇晒8場的Package，泰國5日4夜$2,599，白天仲可以玩埋，值。
世盃前夕，泰國軍方執政機關下令廣電部門，確保泰國國民能免費收看比賽。此舉屬於軍方「喜悅運動」的一部份，此前已推出免費理髮和舉辦演唱會等蛇齋餅糭，世盃更是撒手鐧。當然，以世盃作為與民同樂的懷柔手段或公關術，已不是甚麼秘密。
德葡大戰，德國女總理默克爾親征打氣（圖）；美國對加納，奧巴馬也在社交網站發表握拳睇直播的「實況」照片。哥倫比亞、伊朗等多國政要，都以不同形式表達對國家隊的熱愛。哥倫比亞大勝希臘，更為哥國總統連任增加競選籌碼。英格蘭最後一場，連哈里王子都要飛去捧場。咁講法，狼英係咪應該檢討吓? 搞得掂世盃64場免費播放，公關效果應好過耍那撞鬼八段錦吧。
文：梁偉詩
識睇 一定睇蘋果嘅足動世盃：
http://worldcup2014.appledaily.com/