林嶺東07年拍完《鐵三角》後，佢都有好多年冇拍過戲，最近自編自導嘅新片《迷城》喺尖沙嘴半島酒店舉行開鏡酒會，出席演員有古天樂、余文樂、張孝全同佟麗婭。一向好火氣嘅林嶺東再拍戲，女主角佟麗婭噚日喺台上踢爆古仔話導演好惡，吩咐佢小心。
古仔喺現場聽到即刻講笑指罵佟麗婭，補鑊話：「佢咁好人，你都神經病，我邊有講過！」之後佟麗婭解釋話只係自己緊張，見到導演就驚驚，而佢喺戲中要應付好多逃跑同俾人打嘅戲，幸得兩位男主角保護，古仔因為咁都受咗傷。
古仔前日拍嗰場追快艇戲都出咗意外，古仔話：「隻快艇好犀利，追嗰時連軚盤都飛埋出嚟，要撞埋另一隻船度先至停，我同余文樂隻腳都傷咗。」
用真開山刀拍
余文樂講笑話阿東唔係拍打戲，係拍紀錄片，事關拍斬人戲都用真嘅開山刀嚟拍，在場張孝全都認同話：「第一日原先用假刀，前一晚導演問用真刀好不好，我還以為開玩笑。」
另外，余文樂媽咪噚日入院做手術，佢講：「多謝關心，冇乜特別，佢心臟有啲問題，今晚要拍嘢，可能晏少少去睇佢。」
撰文：馮仁昭