喺過去嘅8場16強賽事，好多場比賽都要打到加時，甚至要用極刑12碼先分出勝負，由此可見各路人馬其實實力上都好接近；有啲球隊就以球星為主要進攻重心，有啲球隊就以整體同防守為主。話咁快就嚟到8強大戰，今日就同大家介紹吓德國隊嘅進攻中場馬里奧葛斯（圖）。
包面葛斯夠cute
葛斯仔上年告別培育佢成才嘅多蒙特，加盟德國班霸拜仁慕尼黑，並好快就喺球隊站穩陣腳。呢位22歲嘅球員被公認為才華洋溢、天份一流，喺中場策劃進攻能夠創造大量入球機會，今屆世界盃暫時亦有1球進賬，不枉德國當正佢係寶，由國家隊U15踢到大國腳。最重要係葛斯仔面形圓圓，靚仔之餘又笑容可愛，印佢嘅波衫全部大賣！
割草式射門係咩？
大家又知唔知「割草式射門」係咩呢？其實係指球員射出嘅波，貼住地面飛向龍門，好似割草機一樣。通常呢種波係用腳面大力踢向波，令個波減少轉動，可以快速直飛入網。
陳婉婷
太陽飛馬助教
識睇 一定睇蘋果嘅足動世盃：
http://worldcup2014.appledaily.com/