各位球迷朋友，經過兩日嘅休息，今晚又要「開工」喇！大家應該都唞足精神去迎接呢個世界盃嘅8強喇啩？回顧番咁多場16強嘅賽事，場場都係一球起兩球止，完全冇分組賽嘅入球騷；可能入咗16強，各支球隊都踢得特別手緊，其實睇落都真係幾悶，希望8強可以踢激啲，等我哋呢班球迷唔使捱住悶睇嘛。
講番16強，雖然我撐比利時，但都覺得美國好唔抵，事關我細細個都同「佢」有一面之緣（圖），而且今日就係美國嘅獨立日，如果佢哋16強出到線，美國國慶就可以多樣嘢慶祝，有一個零舍唔同嘅獨立日啦！只可惜比利時咁勁，美國就算幾落力咁出盡所有必殺技都冇符，惟有下屆再嚟過。
我自己都試過喺啲特別日子鬥波，當然就冇美國咁偉大踢世界盃。記得有次生日同啲隊友去咗足球Camp，佢哋仲同我搞咗個神秘生日party，鬼死咁開心，可以喺呢啲咁特別嘅日子踢波係難忘啲嘅！文：陳子樑
識睇 一定睇蘋果嘅足動世盃：
http://worldcup2014.appledaily.com/