喺蘇亞雷斯被國際足協重罰後，利物浦已經同巴塞隆拿進行洽談，雖然有指利物浦對阿蘇嘅定價為8,000萬鎊（約10.6億港元），不過經歷阿蘇喺世盃又再失控咬人後，球隊對於巴塞隆拿開出嘅7,200萬鎊（約9.6億港元）都認為可以接受。加上最難得嘅係，今次巴塞竟然好豪氣，買人條數一筆清，唔似以前成日要分幾年畀，甚至法比加斯試過要夾錢，幫巴塞手買自己。
美斯大表歡迎
自從阿蘇第3度發作，再次喺球場上咬人後，令到原本想買佢嘅球隊都怕咗佢。不過，巴塞就睇準咗呢個機會，話晒呢個時候買阿蘇，點都係最容易啩！既然喺呢宗收購上嘅最大敵人皇家馬德里，都因為頭號球星基斯坦奴朗拿度話唔歡迎阿蘇，所以放棄收購，咁巴塞梗係又再大打溫情牌啦。今次仲派出球王美斯，話歡迎呢位烏拉圭射手加盟，睇嚟今次咬人蘇真係好大機會做巴塞最後一塊拼圖喎。
不過利物浦又點會咁容易放個當家球星畀你呢？本身紅軍最希望巴塞用錢加阿歷斯山齊士換阿蘇嘅，叫做前線有番個有質素嘅替補嘛。點知呢位智利尖刀唔肯做紅軍，巴塞惟有出絕招啦，一改以前嘅買人作風，為阿蘇做一次豪客都要，7,200萬鎊，一次過畀cash你，唔使分期，似足強國人喺香港金舖嘅情景。
傳紅軍搵定巴神
照𠵱家嘅情況睇嚟，利物浦球迷真係要做好失去阿蘇嘅心理準備喇，呢單交易有機會世盃完結前就搞掂。領隊羅渣士就梗係要搵番個有級數嘅球員頂阿蘇啦，山齊士唔肯嚟，惟有搵過個。有傳紅軍睇中咗巴洛迪利，但我求大俠心諗，走咗個癲嘅，嚟個喪嘅，唔係啩！
識睇 一定睇蘋果嘅足動世盃：
http://worldcup2014.appledaily.com/