社民連秘書長陳德章舊年12月，趁狼振英落區出席施政報告諮詢會時掟蛋抗議，但誤中副車中財爺曾俊華個頭，被控普通襲擊罪，噚日喺東區裁判法院提堂。陳德章喺庭上否認控罪之餘，仲同裁判官講「我比較遺憾擊唔中梁振英」，裁判官聽完只係叫佢「唔使講呢啲」。案件押後到下月4日預審，陳德章繼續保釋。陳德章庭外話，控方首名證人係鬍鬚曾，案情話財爺冇受傷，但就用咗16分鐘清潔。陳德章其實想傳召狼英同陳茂波，又話擲蛋係傳統文化，係向冇認受性政權表達不滿嘅方法，唔係暴力。當日同場另一位成員曾浚瑛亦丟路姆西公仔，佢相信起訴係遲早嘅事。八方心諗，咁玻璃杯咪更加係重中之重嘅調查目標？