栢芝同霆鋒離婚之後，栢芝就帶住兩子Lucas同Quintus移居新加坡，除咗同霆鋒仲有聯絡，基本上同前夫屋企人如同陌路人。咁作為爺爺嫲嫲嘅，想見下個乖孫，都好正常啫。
據昨日雜誌嘅報道，上月19日凌晨，拉姑得知栢芝會秘密帶兩個仔返香港放暑假，顯得非常雀躍，於是就向霆鋒獻計，希望兩個孫可以去維園為爸爸錄製節目《十二道鋒味》打氣，實質當然係想見孫啦！於是霆鋒就出手約見，而栢芝亦表示會考慮。
報道指，去到當日，拉姑同四哥合體現身，仲要一早就到，望落心情都幾好。不過錄影前半個鐘，栢芝WhatsApp霆鋒，就話Quintus唔舒服嚟唔到，拉姑得知後面色大變，而四哥就口嗡嗡好似鬧人咁款。可能係感歎又冇得見啩。
其實栢芝避見拉姑都已經唔係第一次，雜誌引述知情人透露，拉姑每次打親俾栢芝約見，栢芝都推得就推，一時話Lucas要補習，一時又話Quintus有嘢學，總之就十萬個唔知理由定藉口。
而拉姑接受雜誌訪問時，起初講到婷婷新男友Sean時仍有笑容，但一講到返咗香港嘅栢芝，即面有難色苦笑：「約？不如你幫我約佢！今日咁開心唔好講呢啲！」
如果真係好似報道所講咁，又難怪拉姑當日會有咁嘅反應嘅。