【壹週刊】呢個交通警實冇睇劉華個廣告喇！人哋李霖恩被人刮花架車，報警求助，佢竟然講笑咁話：「你都係律師，你應該清楚過我！」
上個禮拜四，一眾《愛‧回家》嘅「查李施律師事務所」員工，到西貢白沙灣碼頭拍外景。點知當李霖恩準備揸自己車去下個拍攝地點時，發現座駕左邊沙板同車門被刮花。嘩！實心痛死喇！
不過就唔使緝兇喇！皆因有個車主已企定定準備「自首」，但雙方就維修地點同價錢拗唔掂數，最後就報警救助。
而李霖恩劇中嘅一班好兄弟，好似黎諾懿、黃子雄、揚明等等都好有義氣，留低陪佢見交通警，兼助一助威。循例李霖恩都要同警察交代事件經過，一班兄弟見悶悶哋，就同搬汽水工人影張大合照打發下時間。
最後阿Sir力勸二人私下和解，仲講笑咁開解李霖恩：「你都係律師，你應該清楚過我！」喂，阿Sir，劇入面先係律師咋喎！李霖恩聽完都唔知好嬲定好笑，回應一句：「阿Sir講呢啲！」之後就趕住去開工喇！
iPhone App免費下載： http://bit.ly/nextplus_iphone
Android App免費下載： http://bit.ly/nextplus_android