金榜集團（172）喺咁多祖國財仔企業當中，PB至抵搞，集團剛啱派上年度嘅成績單，又輕鬆過關，得單位數PE，加埋強勢掌舵，好大憧憬兼有得諗。
金榜最新NAV 0.82元，現價（0.41元）PB，得0.5倍。場內財仔相關公司，中國金融投資（605）同遠東宏信（3360）1倍PB，中國信貸（8207）3倍樓上。金榜嘅PB，起碼平咗一半。又金榜嘅主席係中信前掌舵王軍。之前講過，王生掌舵兩間香港公司，得金榜同中信21世紀（241），後邊嘅中信21，已經俾阿里巴巴入股。
有機會泊大碼頭
呢期所見，行家中國金融公佈，同慧聰網（8292）訂立了全面戰略合作協議。電貿新經濟財路處處，新舊大融合，大家都靠邊站，搵合作夥伴，以金榜咁強勢管理層背景，夥拍到電貿大孖沙合作，應該唔難，而大勢所趨，相信只係時間問題。
金榜啱啱派的上年成績單，純利有13.2%增長，到1.36億銀。呢期阿爺降準，支持中小企同三農，加行副實體經濟動力turbo。
呢壇製作，激活中小企增長，對包括金榜等祖國財仔企業，避免客仔違約，而客仔有增長，業務搞大，長借長有，點都會有着數。再講，金榜剛啱喺上年尾，攞到全國商業保理同顧問服務牌照，有得發大嚟搞。
好保守咁計數，金榜今、明年度，EPS keep住13%增長，到5.6仙同6.3仙，PE得番6.5倍，又係場內最平嘅選擇之一。呢期港股由靜轉動，走勢上，金榜橫行打底半年，都未郁過。短打博升30%到0.54元，明年預測PE得8倍幾，PB得0.6倍。中線博同電貿大孖沙合作可能發生，金榜翻一番到0.82元，PB先啱啱追到中國金融。
錢雋
細價股專家
本欄逢周二、三、五刊出