艇仔張：德叔，你個橙陣果然使得喎，雖然危就危啲，不過2:1反勝墨西哥（圖），都叫波盤齊贏。
德 叔：嗰場波我都有睇，真係嚇到鼻哥窿都冇肉。
肥 頭：德叔，你會唔會8強再買荷蘭先。
德 叔：難得有個專家喺度，問一問肥牛先啦。
大食肥牛：我都睇好荷蘭可以再贏，不過8強對哥斯達黎加，主W得1.38倍，讓到一球/球半，真係驚驚哋。
艇仔張：咁你想點買先？
大食肥牛：呢場波我寧願買走地。講真，哥斯達黎加唔係流，到𠵱家都未輸過，對意大利、英格蘭半場都唔使失波住，如果0:0和到半場，荷蘭W應該都上番1.8倍，嗰陣先出手都唔遲。
艇仔張：我嘅睇法同肥牛都差唔多，信荷蘭可以贏波，但就好難大勝，既然係咁，不如賽前買波膽，荷蘭贏1:0同2:1啦。
肥 頭：講開荷蘭，教練雲高爾幾勁呀，下季佢就轉教曼聯，似乎可以幫紅魔鬼重振雄風喎。
大食肥牛：初步睇都唔錯，但後防仲未有重心，里奧同維迪都走，靠史摩寧就死得啦。
肥 頭：咁睇嚟曼聯都會繼續掃貨，如果華美倫都加盟，咁就夠晒穩陣啦。
人物介紹：
德叔 旺角茶仔老闆
肥頭 吹水怪
祥Hi 肥頭屋村老友
福嬸 茶餐廳侍應
艇仔張 扮專業賭友
大食肥牛 賭精一名，命中率甚高
識睇 一定睇蘋果嘅足動世盃：
http://worldcup2014.appledaily.com/