最近蘋果公司喺網站登招聘廣告，話要聘請「iCup Technician」，唔通蘋果嘅最新產品唔係智能手錶或者智能電視，而係智能杯？
睇詳情，原來蘋果喺美國總部開咗間新嘅員工餐廳Caffe Macs，所以要請人沖咖啡畀員工飲，職位名稱就好型咁叫做iCup Technician，其實同一般咖啡調配師冇乜分別，要識得操作咖啡機、識服務顧客、能跟同事有良好溝通之類，另外亦要識講流利英語、能兼任多樣工作、有良好時間管理，仲要識電腦，唔通入咗去會有機會轉IT職位？
招聘廣告冇列明薪金、福利等資料，只係講明每星期工時40小時。近期有報道指，蘋果請咗一班專家同埋研究員設計Siri新軟件同埋可穿戴裝置，可能總部因此多咗好多人要飲咖啡！