哪吒不怕海龍王，更加唔驚一碌葛。有哪吒之稱嘅西貢區議員方國珊，噚日得悉民建聯新東立法會議員碌葛博士葛珮帆EQ，去到將軍澳石角路新屋苑峻瀅、即係自己主場巡蚊患，即刻聯同將軍澳居民出動狙擊，話將軍澳蚊患嚴重源於堆填區，要求EQ遵守選舉承諾反對堆填區擴建。
據聞EQ見到經常激過泛民嘅哪吒出現都巧京京，一直左閃右避，最終仲叫民建聯職員報警，指有人恐嚇她。哪吒聲言喺混亂期間，一直為EQ護駕嘅六個民建聯職員，用暴力手段阻止佢提問，自己同助理都整傷手臂，要去醫院驗傷。最終有四架警車去到峻瀅，EQ則喺警員護送下敗走。