機管局候任主席蘇澤光要等一年後先返工，原來上市公司行政總裁（CEO）亦都可以簽約先，一年後先至正式上任。貿易通（536）噚日出通告表示，啱啱跟獨立非執董謝錦強簽約，對方將於明年7月1日起出任CEO，任期3年，現時去到明年7月，佢就由獨董轉為非執董。
54歲嘅謝錦強喺金融界打滾多年，做過政府工，1993年加入道富，負責發展區內投資服務業務，2011年轉為兼職顧問。佢現時亦有公職在身，係政府統計處統計諮詢委員會成員，亦係外滙基金諮詢委員會轄下金融基建委員會成員。
貿易通冇解釋點解佢要一年後返工，只講明佢返工頭兩個月屬交接期，候任性質，9月1日先至坐正，年薪千萬元。其實貿易通現任CEO吳偉驄亦好猛料，曾做證監會副主席，之後出任中證監顧問、上交所副理事長等監管機構要職。