學聯同學民思潮日前嘅佔領中環同特首辦行動咁和平，偏偏建制派惟恐天下不亂，幾乎講到唔出動解放軍清場唔得咁滯。其中九龍西鼠王芬好誇張，竟然時光倒流建議組成民間「志願軍」，受訓後協助處理佔中。嘩，難得鼠王芬肯「收兵」，網上即時出現咗「梁美芬志願軍」專頁，報名「參軍」嘅市民好多，有人仲話想同佢手帕交偲嫣BB一隊，相信傅振中同周融等「烈士」，都肯為鼠王芬赤膊上陣啩？
網民設專頁收兵
查實中國喺抗美援朝期間，都組織過參戰部隊中國人民志願軍，官方冇正式公佈過志願軍實際傷亡人數㗎，但坊間就估計，數字約為70萬至100萬！查實市民和平佔中箒，又唔係打仗，使唔使搞到要征召人民志願軍咁誇張呀？莫非美芬志願軍另有任務，係以捉老鼠為目的？
噚日喺立會特首答問大會提出建議後，即刻有「志願者」誠心「追隨」鼠王芬，專登整咗專頁為佢收兵。網頁管理人話因應鼠王芬發言而整專頁，發放嘅訊息會根據鼠王芬發言嘅立場，「監察議員言行、追究言責，乃市民責任」。佢話除非鼠王芬收回言論，否則因應佢意願而實踐嘅行動，責任全歸佢，仲呼籲有志從軍者打去鼠王芬辦事處報名。
好多市民見到呢個專頁即刻留言報名，願意不定期提供鼠王芬活動情報，仲話可以適時出勤保護；一旦有佔領行動，會組成人鏈包圍佔領者㖭！其中Matt Lee表心迹，「一日愛美芬，終身要從軍！」Jony Ho就打瘦咗嘅偲嫣BB主意，「我要同李偲嫣同一個小隊，要佢教我絕食減肥秘技」。
參軍表現若勇武，當然要重重打賞，有人建議志願軍每撲殺過街老鼠10隻，可獲「正義勳章」，並拔擢至「美芬維持正義與和平親衞團隊」，而該宗旨就係「堅決撲殺全銀河系所有老鼠」。佔中發起人之一陳健民就恥笑話，呢種民間志願軍，連內地城管系統都不如，極其量只係緬甸政府用民間隊伍監視昂山素姬嗰個層次。
李八方
mailto:[email protected]