在馬場遇到一位靚女，依稀記得佢係十幾年前與肥仔K一同到耶魯大學校園參加暑期班嘅團友，於是問佢近況如何？靚女C話：「我喺碧科畢咗業嘅嘞，依家在律師樓做住先！」一時聽唔明，請佢詳細解釋。原來靚女C後來入咗大學讀商科，畢業就回港加入一間「碧科」會計師行，三年前已考到會計師（CPA）牌，跟住辭工唔做，入讀中文大學JD班，預計三年後可以成為有牌律師，一身兼兩師（律師/會計師），肯定在中環不愁冇工做。但好明顯，靚女C根本唔需要兩個師嚟搵飯嘅啫，只係為滿足自己願望而已，當今叻女，好有個性，與上一輩專業人士考牌搵好工嘅心態唔同。
呢類叻女叻仔，在「碧科」多的是，佢地流動性好強，要管理佢地並不容易，所以上星期見到Big Four會計師事務所（即畢馬威、羅兵咸永道、安永、德勤）刊登廣告反佔中，左丁山就覺得幾奇怪，以為一定會引起反彈，大公司就某一政治議題表態，無論在甚麼地方，都唔係聰明之舉，何況在今日嘅香港，公然捲入佔中/反佔中漩渦？果其不然，到咗星期一，已有「碧科」一群員工刊登廣告反擊公司。難道泰國有紅衫黃衫之爭，示威頻繁，「碧科」會在（當然係政變之前）曼谷刊登廣告反對示威咩？馬來西亞有政爭，唔通「碧科」又會講兩句？
大公司如此行為，令人不解。呢日碰到一位資深會計師，佢唔係「碧科」中人，但對「碧科」主動涉入反佔中深深不以為然。佢話：「香港會計師公會會員之中，近五成會員嘅年紀低於四十歲，可以講得係年輕人嘅專業團體，年輕人多數係親近民主派，故此梁繼昌可以選得贏，碧科職員亦以年輕人為主，碧科咁樣賣反佔中廣告，有風險㗎，不過唔知係唔係受到高層次壓力箒。」有甚麼高人可以壓逼四間大行一齊刊登聯署廣告反佔中？諗唔通，跨國公司在全世界經營，吃四方飯，務必面面俱圓，若捲入本土政治（local politics），好易會後悔，所以從不公開評論政事，今次破例，須政治後果自負。