平時見到渣打香港個人金融業務主管禤惠儀（Mary）都係行政人員look，最近佢就轉形象，率領渣打香港行政總裁辦公室主管譚何錦文、渣打香港風險管理總監伊韶活等10位高層走去中學做老師。
幾時都話青少年係社會未來嘅主人翁，要社會好，青少年質素、正確價值觀，甚至係理財觀念都好重要。渣打集團（2888）早前編製咗一套本地化嘅理財教材，畀渣打香港員工首次去不同學校擔任義務導師，分享升學心得同埋職場經驗。
渣打將會動員大約400名高層同員工，計劃下半年去全港近40間中學舉行同類活動，一半以上嘅學校來自低收入地區。但剛升任大中華區行政總裁洪丕正就未抽到時間，今年應該未必可以參與。
啱啱做完導師嘅Mary話，無論升學或工作，青年人都會接觸唔同嘅理財選擇，所以今次工作坊加插負責任借貸、善用信用卡、計劃未來等理財知識。