喺國家政策支持下，內地多間文化影視公司排隊上市，繼藝人范冰冰、趙薇有份嘅唐德影視獲批喺內地創業板上市，另一隻「明星股」新麗傳媒亦計劃喺上海上市，新麗傳媒嘅股東包括導演陳凱歌、藝人胡軍，騰訊（700）老闆馬化騰亦有份。
新麗傳媒成立於2007年，前身係東陽新經典影業，投資製作大量電視劇同埋電影，代表作有近幾年熱播嘅內地劇《北京愛情故事》，比較出名嘅電影就有《失戀33天》。
東陽新經典2011年改制做股份公司，易名新麗傳媒，陳凱歌、胡軍、馬化騰等人喺呢個時候入股，胡軍持股0.28%，馬化騰持有大約2%股份。公司上市集資9.2億元人仔，主要係補充影視劇業務嘅營運資金。
另一隻「明星股」唐德影視早前披露，第二大股東趙健係趙薇胞兄，持有約一成股份，趙薇順理成章亦係小股東。內地股市遲吓真係星光熠熠。