有時候企喺球場上最型嘅唔一定係球員，反而係企喺場邊手舞足蹈嘅教練。球隊贏波，大家就會向入波嘅球員舉起手指公；球隊輸波，唔少人就會將矛頭直指教練；球隊低潮，甚至會要求教練自動下台，意大利教練柏蘭迪利更喺世界盃出局後請辭。所以話，教練呢個位認真唔易做，有事鍾無艷，無事就梗係夏迎春啦！
君子路維最吸引
世界盃芸芸教練當中，當然搵唔到玉樹臨風、英俊瀟灑，畢竟年華已過。但識睇就梗係要睇一種歷盡風霜魅力，德國教練路維（圖）就表露無遺啦。路維𠵱家54歲，球員時代並唔算特別風光，但自從帶領德國隊喺近年屢創佳績，大打進攻足球，場外訪問以謙謙君子形象示人，從來唔會好大喜功。加上帶點滄桑外表同低調造型，比起嗰啲髮型標奇立異、行為浮誇嘅球星更有吸引力。
「突然死亡」最殘酷
世界盃現正處於淘汰賽階段，當法定時間同加時至120分鐘都未分勝負嘅話，就會以12碼形式分高低。若經過頭5輪都係打和，咁就會進入「突然死亡」階段，即一射唔入而人哋射入，就即刻出局。
陳婉婷
太陽飛馬助教
識睇 一定睇蘋果嘅足動世盃：
http://worldcup2014.appledaily.com/