祥 Hi：德叔，畀個腿蛋治加凍檸茶我行街。
德 叔：唔坐低食？你見唔見邊個坐咗喺艇仔張隔籬啊？
祥 Hi：咦？人稱逢賭必贏嘅大食肥牛喎，等我去套啲勁料先！
大食肥牛：祥Hi，好耐冇見喎！
祥 Hi：就係知你牛哥犀利，特登過來問吓來你8強有咩心水。
艇仔張：牛哥，你咪過啲料畀祥Hi囉，等佢唔好亂買。
大食肥牛：嗱！你睇吓，一入淘汰賽，少咗幾多波入，開咗幾多場下盤，就知用之前分組賽啲策略去買，一定輸番晒！
祥 Hi：咁你覺得8強同16強都差唔多？
大食肥牛：入球一定唔會多囉，尤其法國對德國呢啲，落後畀對方1球就隨時輸得，兩隊都算守得吓，點計都唔會好進取囉！
祥 Hi：有冇邊場你覺得好穩陣，一定有得執？
大食肥牛：巴西對哥倫比亞。嗱，呢場波有乜理由初盤仲開半/一，巴西踢得咁差，哥倫比亞（圖）又輕鬆贏烏拉圭，肯定落晒飛去哥倫比亞。初盤客W有5倍，𠵱家得4.7倍，證明大把人走去買啦。一場還一場計，巴西話晒主辦國，造都造佢入4強啦！
艇仔張：牛哥，咁阿根廷對比利時，你又有冇高見？
大食肥牛：比利時啦！阿根廷讓得咁少，平/半盤口，我見阿根廷進攻又麻麻，後防又唔係穩，未必頂得住比利時班快馬，所以呢場和波機會都幾大，睇嚟都要加時。
祥 Hi：同我諗法差唔多！一陣就去投注站，我幫你畀。
人物介紹：
德叔 旺角茶仔老闆
祥Hi 肥頭屋村老友
大食肥牛 賭精一名，命中率甚高
艇仔張 扮專業賭友
識睇 一定睇蘋果嘅足動世盃：
http://worldcup2014.appledaily.com/