終於捱完8場16強大戰，點解說捱完？因為當中有5場打到加時，更有兩場要互射12碼，對球員殘忍，球迷也不好受。如哥斯達黎加對希臘，香港時間4點開波，踢足120分鐘仍是1:1，最後射完12碼已是清晨6點多，大部份打工仔都要預備梳洗上班了。如此捱法，難怪不少人都大大個黑眼圈返工，除非老闆聽奇連士文話，肯讓你放假吧。
8強出爐，歐洲美洲兩邊各有一場內訌，也有兩場正面對決，4打4戲碼算是公平；細分之下，歐洲佔4席（2.05倍）、南美洲佔3席（1.68倍）、中北美洲得1席（70倍），始終南美隊有主場之利，可藉地利補隊數較少，難怪在足智彩的勝出洲份賠率較熱。不過如此乏味，是但買場[半和]好過。
比賽不一定多波入先好看，如德國對阿爾及利亞，以及比利時對美國，兩場波都是90分鐘打成0:0，卻沒有半分鐘冷場，攻守皆顯示上佳技術；其中比美戰中，美國門神侯活作出15次撲救，真正的一夫當關，萬夫莫開。其贊助商之前於廣告中把他變成The Hulk，真有先見之明。
其實今屆打起不少門將，由「墨西哥Sam哥」奧祖亞、哥斯達黎加的基羅拿華斯到阿爾及利亞的麥保希都能「隻手遮天」，德國的紐亞更加踢埋中堅，不時出迎剷波；不過，要數今屆的「門神」當然是侯活，不知今年三十有五的他，4年後會否再於俄羅斯世盃現身？
文：仙道彬
識睇 一定睇蘋果嘅足動世盃：
http://worldcup2014.appledaily.com/