摩根大通行政總裁戴蒙（Jamie Dimon）近日向股東與員工發表聲明，話自己患上喉癌，相信係喺喉嚨及右邊淋巴位置。佢將會接受為期八周嘅治療，不過好彩醫生發現得早，𠵱家仍然有得醫。
雖然話預期可以好番，但有消息話董事局都準備好長、中、短期嘅接任方案。早前接班大熱Michael Cavanagh過檔私募基金凱雷，董事局就搵咗另外三位候選人，分別係消費業務主管Gordon Smith、資產管理業務主管Mary Erdoes同埋投行業務主管Daniel Pinto。
戴蒙2005年起做摩通CEO，2008年金融海嘯期間，摩通表現好過其他同業，戴蒙應記一功。不過，2012年倫敦鯨事件，戴蒙被指低估事態嚴重；舊年摩通又因不當銷售按揭證券被罰130億美元，接二連三嘅負面消息令戴蒙聲名受損，有人叫佢落台，𠵱家又患大病，認真要保重。