香港人對「叮叮」電車特別有感情，中環人如果約人落金鐘、灣仔、銅鑼灣食晏，坐叮叮好多時方便過搭港鐵（066）或者的士。原來香港電車公司成立至今已經有110年，本月31日就係牛一，電車公司計劃喺當日開放車廠畀110名香港市民參觀，本月15日早上9點網上登記留座，不設即場登記㗎。
電車公司原本由吳光正嘅九龍倉（004）持有，2009至2010年陸續將股權賣晒畀法資嘅威立雅交通中國公司，換咗大股東，叮叮呢幾年嘅服務都冇乜大變化。為紀念110周年，除咗牛一當日畀110名市民參觀電車廠，仲會跟貿發局合辦「叮叮遊．香港史」電車遊活動，又即將出版故事集《電車．人．物．誌》，成件事都充滿歷史氣息。