每年7.1，社民連主席長毛梁國雄都會企喺銅鑼灣嗌咪籌款，唔少粉絲俾佢吸引留步；今年長毛被政治檢控被迫缺席7.1遊行，但冇咗長毛嘅社民連街站，人氣依舊，唔少市民因為要撐長毛，反而更願意鋤強扶弱，捐錢畀社民連時不斷高叫：「長毛坐監，官司幾多錢，我多多都捐！」
八方噚日發現捐錢畀佢哋嘅市民可謂跨世代，由年輕人、師奶以至阿伯，個個都唔手軟；長毛變短毛嘅被扣留相，仲製成橫額畀市民影相。社運電影《未夠秤》男主角、社民連馬雲祺更變吸金新星，佢個籌款箱成績相當唔錯，入面仲有兩張500蚊；唔少人捐完錢，仲爭住同馬仔影相㖭呀。