特首梁振英執政無能，財委會主席吳亮星日前粗暴表決新界東北前期撥款惹公憤，令遊行稀客譚小環與港版半澤陸駿光和歐錦棠等，昨日身體力行參與7.1遊行。首次站出來的小環，矛頭直指吳亮星的「暴行」，令她無懼風雨站出來，爭取公義。
香港回歸轉眼便17年，在特首梁振英的領導下，香港民怨載道，近日爆出吳亮星及白皮書事件，嚴重打擊香港民主自由，逼市民上街！昨日演藝界紛紛出來發聲，港姐譚小環、歐錦棠、龍小菌、蘇玉華、港視藝人麥子豪、港版半澤陸駿光、周家怡、𡃁模Naomi（馮鎵瀠）、何浩文、文恩澄、吳彤、王宗堯、藍奕邦、彭秀慧、蕭若元、DJ茜利妹、樂隊Mr.成員Alan和RubberBand成員阿偉等，各人雖然抱着不同的訴求出發，但終極目的是向香港政府說不。
感受到香港人團結
過往政治冷感的小環，回顧香港過去一年發生的變化，喚起了她熱血的心，昨日小環孖住老公蔡強榮上街，夫妻同心，一齊高舉「香港自救爭普選」的海報，沿途與市民齊聲向無能政府表態。小環說：「近一年覺得香港好似改變咗，尤其之前喺立法會吳先生（吳亮星）強暴通過撥款，令我覺得要行出嚟。」早前小環都有參加電子公投，她認為爭取公義要身體力行：「用自己雙腳行出嚟，盡香港市民嘅責任。」蔡強榮亦說：「香港點解會變成𠵱家咁？好陌生！」即使遊行中段遇上風雨，也無阻小環前行決心，她在電話中說：「第一次出嚟遊行，感受香港人好團結，就算落雨淋濕晒，市民都會遮埋隔籬唔識嗰個人，唔同黨派都會自發互相關心，呢啲係睇電視感受唔到。」
阿棠不滿橫蠻政府
有份上街的歐錦棠昨日大讚遊行秩序：「市民質素極好，想要有得揀，港人出嚟行！行出嚟表達我哋對呢個橫蠻政府嘅憤怒！」
為撐普選不遺餘力的龍小菌同樣鬧爆吳亮星：「自把自為，申請撥款係納稅人嘅錢，而錢係應該為港人服務，希望司法覆核成功。」她公開表態自己政治立場，無懼影響工作：「生活喺呢度，自己屋企事搞唔掂，點講其他嘢？」擺明寸爆梁振英女兒割腕事件。
首次參加遊行的文恩澄抵死用動物揶揄政府官員：「唔知點解多咗隻『豬』，唔講人話嘅『猩猩』，隻『狼』越來越惡。」Naomi不屑其他藝人怕打爛飯碗拒遊行：「佢哋怕死，不過我堅持。演藝平台已經俾人扼殺，冇糧出嘅電視台就有牌，有誠意有製作嘅就冇牌，我唔怕死，最多攬住一齊死。」陸駿光也說：「如果唔出聲，就會俾人插晒線，控制諗法。」
RubberBand成員阿偉則說：「今年遊行好似被刁難咁，喺維園等足4個鐘都行唔到，人群中聽到警方唔肯開路，但我會堅持行到政總。」歌唱老師胡顥耀（Bryan）昨日先後在銅鑼灣的希慎、崇光及時代廣場快閃唱《問誰未發聲》撐遊行。
採訪、攝影：馬建華、王連連、譚倩宜、沈健程
【7.1上街 學界佔中】YouTube收看蘋果動直播：
http://bit.ly/71march