龔慈恩之前因為盲腸炎入院做手術，仲喺前晚上載咗幾張醫院影嘅相上微博，寫話：「告別醫院，回家了！感恩！因為盲腸炎而能及早發現9cm腫瘤，否則後果不堪設想……」睇落好似好大件事，佢噚日接受電話訪問話：「24號覺得肚痛，第二日入院check，發現近盲腸位置有個腫瘤，咪腫瘤連埋盲腸一次過切埋，醫生都話好彩，個腫瘤好大，如果爆咗都幾危險，個手術亦都好順利，住咗幾日醫院。」
因為咁樣發現到有個巨型腫瘤，都算不幸中之大幸，好彩經過化驗個腫瘤屬於良性，所以唔使咁擔心，仲喺前日出院返咗屋企休息㖭！
索爆囡囡愛唱歌
不過龔慈恩因為今次入院做手術，錯失咗同楊千嬅、古天樂擔合作演出電影《五個小孩的校長》，佢話：「真係好可惜，我好鍾意個劇本，電影公司等咗我三日，因為住院嗰幾日咁啱拍重頭戲，最後都拍唔到。」另外，龔慈恩亦都上載咗一對仔女嘅相上微博，14歲大女眼大大，個樣似足媽咪咁靚女，囝囝個樣就似爸爸林煒，龔慈恩話囡囡又高又瘦，好鍾意唱歌，不過入唔入行都係言之過早，讀好啲書再講。
撰文：馮仁昭
