如果搵鍾庭耀做一次民意調查，第三條跑道是否應該興建，左丁山幾相信多數民意會支持，香港市民對赤鱲角機場嘅設施與服務，絕大多數有讚冇彈，事實上大家旅行時去過其他地區機場，比較一下，赤鱲角點會輸蝕呀？左丁山所見之香港外國朋友，對機鐵（機場快線）可在二十五分鐘內去到中環心臟地帶，感到有點不可思議，讚不絕口，想當年，有一位名人就曾反對興建機場快線，撰文指機鐵會係大白象，根本無需要，依家相信呢位名人都會用吓呢條機場快線啩。
鐵路係公家（第三者）起嘅，沿線物業因交通好，樓價大升，得益者就係私人，第一個得益者係發展商，第二個得益者就係買樓人士，最佳例子係沙田第一城，最近第一城細單位（395呎）創下實用呎價逾一萬三千元嘅高紀錄，成為地產版大新聞。建築邦結婚時，就係買第一城395嘅，作價好似係22萬，買完樓之後，銀行存款只有幾千蚊就組織新家庭，勢估唔到現在貴得咁厲害，395單位多位於接近馬鐵第一城站嗰邊，乘馬鐵去大圍轉車南下九龍或北上上水，甚為方便，有咗呢個車站，樓價提升，在所難免，早已買咗樓嘅業主就最開心。
但呢個條件不足以解釋第一城或其他藍籌屋苑價格點解上升得咁厲害？經濟學有一個概念rational expectation（理性預期），可用嚟解釋吓。梁振英推出三D辣招，滿以為可以壓抑置業需求，幫助市民置業，但施永青等地產專家早已指出冇用，反而會因為交易費用上升，同時壓抑咗二手樓供應（因炒家絕跡，可交易樓盤減少），推高樓價，梁振英呢位產業測量師啱還是前線物業代理啱呀？毋須多講。
此外，梁振英雖然想話大量增加土地供應，但事實證明，特區政府搶地，碰壁多過食生菜，區議會反對（即Nimby效用），環保派反對（填海取地難行），保育派反對（如拆卸邵氏影城），鄉村反對（如新界東北），理性市民嘅理性預期，就係增加可建土地不易，新單位供應增加喎，係口惠而實不至，有排等，不如搶購現成樓盤先！總之反建設派聲音越大，樓價越升！