愛兄弟定愛黃金？NBA熱火小前鋒勒邦占士（LBJ），應該會答黃金多啲，呢位福布斯全球100大最具影響力名人榜嘅巨星，決定只會接受頂薪合約，咁就一鑊蹺起好兄弟獲迪同保殊，睇怕熱火三巨頭都會成為絕響。
全球第2大影響力名人
今屆總決賽輸畀馬刺之後，LBJ口口聲聲話會減薪續約，等熱火有更多子彈簽新球員，好似紐約人前鋒安東尼、速龍控衞洛利等，連獲迪同保殊兩位好兄弟都跳出合同，等候大帝發落。不過最近LBJ就改口風，話只會接受約2,200萬美元年薪嘅頂薪合約，環顧成個聯盟，其實都有7支球隊有薪酬空間滿足LBJ胃口，當中梗係有熱火，不過如果熱火要續簽LBJ，所餘薪酬空間就冇幾多，如果要留埋獲迪同保殊，一係兩人大幅度減薪，一係就要交鉅額豪華稅，球隊更加冇子彈喺自由市場再簽猛將。
10年勒邦占士首次成為自由人，整咗個「 The Decision」公佈自己會去熱火，不單成為騎士球迷公敵，好多中立球迷都反感。今次LBJ就學精咗，全權交畀經理人歷奇保羅去傾，自己唔再做醜人。其實人為財死，LBJ要求頂薪，情理上都唔怪得晒佢，而且佢11年職業生涯都未試過做球隊頂薪球員，要搵多啲都情有可原，不過福布斯剛公佈嘅全球100大最具影響力名人榜，勒邦占士排名第2（見附表），僅次於樂壇天后Beyonce，上年收入亦達到7,200萬美元，收少啲人工，都唔係過份呀，好似香港地產商咁要賺到盡，到時就失去民心啦。
K艾榮率先續約騎士
之前有傳勒邦占士想返母會騎士，不過騎士就似乎唔多感到興趣，據報騎士已經同控衞K艾榮達成5年9,000萬美元嘅續約協議，而選秀大會亦都揀咗小前鋒A域堅斯，有呢兩個狀元撐場，唔使勒邦占士回巢都有機會做番勁旅啦。
識睇 一定睇蘋果嘅足動世盃：
http://worldcup2014.appledaily.com/