狼振英政府想推嗰啲洗腦國教，好似想學生見到國旗、區旗嗰陣，就要感動到流眼淚咁。噚日狼英同狼太仲親身示範，誇到疑似拎手巾抹眼淚鼻涕㖭。唔單止咁，做完感動升旗流涕騷後，狼英喺回歸酒會上仲冇大冇細，竟然要堂堂國家領導人級別嘅全國政協副主席兼前特首董建華「讓路」，隔住老董同中聯辦主任張曉明碰杯，雖然西環力撐下做特首啫，但都唔使擦鞋擦得咁誇張啩？
狼英似乎冇受次女𠝹手事件影響，噚日出席升旗禮，聽住國歌睇升旗嗰陣時仲好有心情咪嘴跟住唱，反觀俾囡囡公開鬧爆嘅狼太就揦埋口面、滿懷心事咁款。而國歌啱啱唱完，狼英即刻捽一捽眼角，狼太則合拍到一齊攞條手巾出嚟抹鼻，唔係感動到流涕咁誇張啩？相對旁邊呆呆哋嘅董伯伯同後面chok到行嘅蘇錦樑，狼氏夫婦係咪浮誇咗啲？
祝酒要董伯伯讓路
酒會上嘅狼英繼續貫徹The show must go on精神，祝酒時非常識do，先同佢身右嘅董伯伯同張曉明等駐港機構代表祝酒，其後再到佢左邊嘅終院首席法官馬道立、前特首煲呔、三司等人。
但佢同董伯伯旁邊嘅張曉明祝酒嗰陣，竟然要董伯伯退後「讓路」。而經常暗寸狼英嘅鬍鬚曾同曾主席，就背住狼英笑騎騎祝酒。至於台下嘅狼太等狼英「下台」後，孖住老公滿場飛，唔少女士仲上前同狼太吹水，唔知係咪安慰狼太呢？
李八方
mailto:[email protected]