福 嬸：你哋又話免費台唔播16強嘅？點解我噚日一開電視，就睇到阿根廷嘅？
肥 頭：福嬸，你有冇留意你睇嗰陣幾點啊？
福 嬸：好似3點幾，噚日瞓得唔好，諗住起身睇吓粵語殘片，點知一開就係波。
肥 頭：你都識講3點幾啦，場波係12點踢，凌晨兩點完，你睇嗰個唔係直播，係延播。
福 嬸：係咩？哈哈，我唔知喎，有得睇咪好囉！
艇仔張：點同呀？爭好遠，唔係直播根本就冇意義。你諗吓，我一早知道場波嘅賽果，睇到入波仲會嗌咩？
德 叔：計我話，電視台想收多啲廣告費箒。
肥 頭：好彩8強都至少有得免費睇兩場。係喎，8強點睇啊，艇仔張？
艇仔張：我覺得荷蘭最穩陣，哥斯達黎加點都唔似可以入到4強啩？
肥 頭：唓，好難講，16強打少個又可以靠12碼過到骨，我𠵱家全力支持佢哋㗎啦！最好幫我隊西班牙報仇，搞掂荷蘭。
德 叔：嘿，邊個攞冠軍我就唔知，但噚日上網睇到個數據，話原來世界盃史上除咗90年嘅阿根廷，就冇試過有第2支球隊可以喺同一屆賽事嘅淘汰賽，靠12碼連贏兩場，呵呵。
肥 頭：德叔，紀錄係用嚟破㗎嘛！
人物介紹：
德叔 旺角茶仔老闆
肥頭 吹水怪
祥Hi 肥頭屋村老友
福嬸 茶餐廳侍應
街霸Ken 收費電視企街sales
艇仔張 扮專業賭友
識睇 一定睇蘋果嘅足動世盃：
http://worldcup2014.appledaily.com/