文章見街時已打完十六強賽事，如無意外阿根廷險勝入埋閘，美國小爆冷挫比利時（如果兩樣都估錯，大家以後跟我燈頭搵食，夠贏首期），八強裏面有巴、德、荷、阿、法，睇番當日未開賽時預測四強「巴德西阿」，好聽叫做及格，唔好聽就真係中西毒：西班牙之痛令唔少人流淚蝕錢甚至填命，記一世。
落筆時乃七一遊行之前，直覺係要睇埋德國對阿爾及利亞至好寫，結果無錯，又一次贏波輸盤，莊家從來對任何強隊賽事都無諗住放過你，德國讓兩球絕對係粉絲捕獸器，之前仲放風阿爾及利亞球員班回教徒過緊齋戒月，日出至日落唔食嘢甚至盡量唔飲水（你係咪當我儍先）？體力會下跌，大手交易云云，你信就瀨嘢喇。
成場波班北非佬邊忽似冇食飯？能攻善守，隨時全場喪奔，個龍門仲要力救幾個險球，臨完場到加時階段，直情穆罕默德上身咁，球隊雖然俾德軍執兩劑，但臨吹雞前轟入一個世界波，連德國粉絲都讚埋一份，非常有體育精神，反而我醉到瞓咗一半，自慚。
反觀尼日利亞，明明食飽飯，硬係似收咗兩袋米表現古怪（今朝香港真係用派米去收集反佔中簽名，知咩事啦），非洲隊例牌。
見過荷蘭苦戰最後五分鐘轉敗為勝、阿爾及利亞唔認命力抗，證明世界永遠會有奇蹟，只要你肯去嘗試，足球好睇在於無贏硬輸硬，七月二日頭版係香港人勝利。
文：梁柏堅
識睇 一定睇蘋果嘅足動世盃：
http://worldcup2014.appledaily.com/