今時今日，某人或某間公司發明某樣產品，走去申請專利保障自己利益應該係常識，偏偏正在公開招股嘅慢回彈健康枕生產商盛諾集團（Sinomax，1418）講明，公司使用自有嘅化學配方同埋技術知識生產慢回彈材料同埋其他聚氨酯泡沫，但未有申請任何專利，如果有人攞到相關資料又走去申請知識產權，反而可以禁止或阻止佢哋生產㖭。
Sinomax喺招股書風險因素一欄解釋，冇申請專利，係因為喺內地申請專利，須要公開專利項目嘅相關詳細資料，佢哋相信，披露呢啲資料將會向競爭對手提供配方同技術知識嘅詳情，令到對手可以模仿佢哋嘅生產方法或改良本身嘅生產。公司承認，未必有足夠嘅法律保障去防止第三方生產或營銷相似產品，其他人仲可能申請專利。
同技術人員簽保密協議
Sinomax只係跟若干名知道化學配方同埋技術嘅員工簽訂保密協議，就係咁咋。難怪呢間公司嘅高層大多都有親戚關係，又係股東，將利益完全綁埋一齊。