點解足球咁好睇呀？我諗淨係呢排嘅世界盃都已經可以答到你。真係冇話邊隊可以贏梗，強隊都有機會爆冷咁輸，你可以話強隊踢出嚟冇霸氣，但換個角度嚟睇，強隊都要睇狀態先踢到好波㗎，好似巴西對智利嗰場，唔好講兩隊波響120分鐘嘅表現點嘞，齋睇12碼都睇到心都跳埋出嚟啦！呢啲咪夠激囉！
我自己都試過鬥波鬥到互射12碼嘅生死關頭，去到呢個位直頭可以用恐怖嚟形容，啲人話係極刑真係冇講錯，因為去到嗰刻，個腦真係一片空白。不過教練都有教我哋，如果真係冇信心射12碼嘅，最穩陣嘅方法就係怒射中間，除咗中龍機會大之外，就算keeper拍到都有機會入吖嘛。
我呢啲唔識死嘅，就梗係走去射兩邊啦，so far都好好彩，多數入嘅。至於去到世界盃呢啲超級水平，要鬥到互射12碼嘅話，我覺得最多、最多都只係可以射失1球咁大把，換言之，巴西（圖）嚟緊要捧盃就真係要再加把勁啦！文：陳子樑
識睇 一定睇蘋果嘅足動世盃：
http://worldcup2014.appledaily.com/