唔經唔覺就睇完16強嘅賽事，你哋支持嘅愛隊同球員能唔能夠進入半準決賽呢？比賽係咪好緊張刺激？定係殘酷不仁？我就覺得每場比賽都好好睇，既有熱血沸騰嘅時候，又有哀傷痛哭嘅場面。球證嘅誤判有時直接影響比賽嘅結果，望住電視機裏面嘅球員露出想喊嘅神情，真係連唔識波嘅阿媽都大叫「好唔抵！」
光頭韋比至易認
世界盃嘅球證係由五大洲推薦，再經過嚴格甄選，如果話踢世界盃係球員嘅王者舞台，相信吹世界盃同樣都係球證嘅最高榮譽。講起球證，大家通常會對罰得愛隊較多，或者吹錯12碼嘅球證印象特別深刻，即係好似揭幕戰嘅西村雄一咁。其實不妨留意吓吹得好嘅球證吖，當中都有好多好型㗎！例如好出名嘅英國球證韋比（圖），高大魁梧加上光頭造型，樣子嚴肅，好易認。雖然韋比嘅判決都經常惹人質疑，但至少每場嘅尺度都相若，平均水準仍然係頗高同穩定，大家喺嚟緊嘅比賽可以睇吓遇唔遇到呢位星級球證。
最易俾「插水」考起
球證最困難之處應該就係判決「插水」，即係球員扮被侵犯，以博球證判罰對手，希望韋比喺世界盃唔會俾「插水」影響判決啦！
陳婉婷
太陽飛馬助教
識睇 一定睇蘋果嘅足動世盃：
http://worldcup2014.appledaily.com/