萬嘉集團（401）剛啱派上年度嘅成績單冇幾耐，純利比上市預測底數多咗22%，得8倍PE，吸引到痹，有得諗。
萬嘉係福建省龍頭醫、保零售連銷店經營商，兼營醫、保，同埋醫療器械分銷，向客戶提供高達1.5萬種唔同種類嘅產品。
而單喺福建省，萬嘉就有四個總面積237萬平方呎嘅物流中心。講地區規模晒士、產品種類，同物流配套，萬嘉齊晒。
內地醫保需求大
萬嘉啱啱派上年10月上市以嚟第一張年度成績單，上年純利4,892萬銀，增長17.1%，純利數額，兼超過集團上市預測純利底數4,000萬銀，靚仔到爆。綜合專業評估，祖國上年醫保開支3.3萬億銀人仔，到咗2020年，會達翻一番樓上，到7萬億銀人仔。又場內預計，健康產業喺嚟緊呢三年，會keep住14%至17%增長。
唔單止人口老化問題，空氣、食物鏈污染，加埋都市人作適飲食習慣，都衍生對醫保需求，加埋萬嘉上邊優勢，肥仔水。
唔好估多，萬嘉今、明年度EPS，只係keep住大圍17%增長，到8.8仙同0.1元，明年度PE跌到得番6倍，平霸。又萬嘉現價（0.62元）仲係貼近上市以嚟低位，家陣PB得0.38倍。場內隨便搵一、兩隻，鳳凰醫療（1515）4.9倍PB、新銳醫藥（8180）1.9倍。就算比起阿媽華夏醫療（8143）0.76倍PB，萬嘉都平咁一半。
萬嘉現水位嘅街貨市值，得1.5億銀咁大把，有乜潛在好消息，包括係咪落實同北京萬通立體之城合作，萬嘉變火箭，真係唔難。咪扯咁遠，當追行家，萬嘉翻半番到0.93元，明年PE得9倍，PB先啱啱造到阿媽，但未有耐追到行家。
錢雋
細價股專家
本欄逢周二、三、五刊出