巴西喺嚟緊嘅本港時間星期五深夜，就會出戰8強，迎接另一支南美強隊哥倫比亞嘅挑戰。賽前教練史高拉斯話，球隊好年輕，缺少經驗可能成為球隊嘅致命傷，仲話上一場射12碼，連有經驗嘅球員都緊張，唔知係唔係暗示緊有傳拒絕射12碼嘅隊長堤亞高施華嘞。大菲可能想班球員鬆一鬆，日前帶咗佢哋去泳池度做訓練。至於之前一直傳有傷，8強未必踢到嘅尼馬都有參與；大菲話佢治療後應該出得，不過未必會好fit。
踢得差賴波砵
一班鬼馬嘅森巴球星去到泳池，就梗係冇咁正經㗎啦，特別係出名搞笑嘅大衛雷斯，表情扮鬼扮馬，跟住又扮晒正經咁幫隊友路爾斯古斯達禾做頭部massage。不過，就算去到泳池，眾人嘅焦點仍然落喺尼馬身上。喺16強表現麻麻嘅尼馬，竟然好賴唔賴，話係對砵唔好着所以影響咗表現。我求大俠都明白，一對砵對足球員嚟講，就等如一個劍客把劍咁重要。但係「一剔」一年畀咁多贊助費你，仲畀晒面你特登為你出對土豪金波砵，你喺對智利嗰場着咗半場就換番對紅砵就已經落晒「一剔」面，得罪晒個米飯班主㗎啦，仲要賽後賴地硬，自己表現唔好就咪怪對砵啦。
我求大俠話你知，一個最頂尖嘅劍客，就算只係用一把餐刀都可以發揮得好好㗎！巴西10號仔喺球壇嘅地位，就有如武俠小說入面嘅獨孤求敗，你會唔會聽到佢賴把劍唔好用吖？話雖如此，仍然有傳尼馬喺8強對哥倫比亞，都會繼續着對土豪金波砵，唔知係佢已經同對砵建立好默契吖，定係想輸波有個落台階嘞。
話時話，哥倫比亞嘅占士洛迪古斯都係着「三間」入世界波，周五大戰，正宗係「一剔」鬥「三間」！
識睇 一定睇蘋果嘅足動世盃：
http://worldcup2014.appledaily.com/