「自問以前政治冷感，但自從港視發唔到牌，多咗留意政治，加上近排爆出官商勾結、唔聽民意、踐踏自由，真係好恐怖，完全同以前係唔同晒，呢啲問題都關乎我哋切身。」
導演張同祖 爭取真普選
「𠵱家嘅香港只有一個強權政府做埋晒啲唔合理嘅事，咁嘅亂局就因為冇真普選，梁振英當自己係皇帝，唔聽反對聲音。大陸政府簽咗中英聯合聲明，𠵱家又喺全世界面前食言！」
𡃁模Naomi 盼改善經濟
「今年第二次參加7.1遊行，我覺得唔可以唔出嚟發聲，政府政策太差，我嘅訴求係首要改善經濟，樓價太高，我哋呢輩根本上唔到車。唔理行出嚟嘅結果係點，至少我有出嚟表態。」
藝人王宗堯 對政府失望
「我會同港視一班藝人出嚟參加7.1遊行，我認為係基本香港人都要出嚟講嘢，我哋好想畀政府知我哋需要有真普選，過去一年香港改變太大，令我對政府好失望。」
歌手龍小菌 斥特首獨斷
「我同大部份港人一樣，今年行出嚟爭取真普選，香港人急切要有一個愛香港嘅特首，起碼可以聽民意解決問題，見到𠵱家咁好心痛。尤其吳亮星事件，令我哋要多出一分力。」
歌手吳彤 勸正視民意
「呢次最大訴求係爭取真普選，政府要正視民意，唔可以再扭曲。我喺遊行完仲會出席遮打花園嘅集會，我會上台唱出《問誰未發聲》，同埋六四歌《黃雀飛》。」
歌手何浩民 享受唔到福利
「政府太過腐敗，令香港人生活越嚟越辛苦，土地唔起居屋去起豪宅，市民交稅得唔到應有嘅福利，點解政府服務對象唔係香港市民？睇公投都成70幾萬，就知大家都醒覺。」
藝人麥子樂 喚醒沉默者
「作為香港人，點都要出一分力，影響埋身邊嘅人，其實好多人係「沉默」，但近年發生太多問題，我要出嚟喚醒大家。我哋80後經歷97回歸，呢幾年感受體會好深。」
導演潘源良 轟政府唔變通
「我差唔多每年都會去，聽日都會去行，我嘅訴求係希望政府應該聽吓人意見，唔好咁死牛一面頸。」
【7.1上街】自己政府自己揀，直播7.1大遊行:
http://71.appledaily.com/