美國隊於今屆世界盃雖然未算好出色，但喺神奇教練奇連士文嘅帶領下，每場分組賽都獲得好評。人腳上當然唔出眾，但限米煮限飯嘅情況下，美國隊嘅表現已超出預期。特別要欣賞嘅係，以往美國隊會多用體力化同高空攻勢嘅踢法，但今屆世盃明顯嘗試多咗小組滲入，而且反擊機動，製造唔少具質素嘅埋門。
今晚睇實格拉咸素斯
睇咗幾場，發現幾位將一把長髮又電又鬈嘅球員好搶眼，但型唔型呢啲就好視乎個人喜好喇，好似我見到碧卡文個頭就簡直覺得會有蟑螂爬出嚟咁污糟。反而將一把長髮簡單束起嘅19號右中場格拉咸素斯（圖）就清新得多，加埋啲鬍鬚就認真瀟灑不羈。有時型都可以好簡單嘅，今晚對比利時可以望多兩眼㗎！
穿心腿可直紅
大家有冇睇到幾場比賽都出現「穿心腿」呢？其實係指球員喺搶波時將腳舉到人哋心口咁高，仲要踢中人踢唔中波！呢種行為除咗會被判罰「舉腳過高」，更有機會係暴力行為，直接紅牌出場。
陳婉婷
太陽飛馬助教
識睇 一定睇蘋果嘅足動世盃：
http://worldcup2014.appledaily.com/